英國禁止公部門抵制以色列

【世界台】英國禁止公部門抵制以色列

2016/02/22

文 / 周盈成

以下這篇短文，是用教育部公布的台語標準用字寫成。一點都不難，認得中文、略通台語， 就懂八九成了。還有聲音檔唸給你聽，許多字詞也超連結到教育部《臺灣閩南語常用詞辭典》。看世界新聞，兼學台語文，就是【世界台 ~ Sè-kài Tâi】啦

為著抗議以色列對巴勒斯坦人的壓迫，國際上有抵制以色列商品的運動。英國政府最近規定，公部門的機關團體，不准閣參與抵制。這引起袂少爭論，批評者講，這是侵害在地民主。

2005年，巴勒斯坦的團體發起訴求抵制、撤資、制裁的BDS運動，對以色列施壓，佇世界得著濟濟支持。英國嘛有一寡地方政府加入，拒買以色列的產品，尤其是佔領區約旦河西岸生產的。In認為這是一種道德責任。

頂禮拜三，英國的內閣辦公室大臣Matthew Hancock訪問以色列，仝時陣公佈新的規定，講根據世界貿易組織（WTO）的政府採購協定，身為簽署國的英國著平等對待其他的簽署國，任何的政府採購，若是歧視以色列的供應商，就是違反協定。

政府的聲明講，公部門對以色列商品的抵制「無適當」，超出政府對外的正式佮合法制裁，而且會激化反猶主義。今後違反新規定的機關團體會受著重罰。

以色列對英國的新規定表示歡迎。另外一方面，BDS運動堅持抵制行動合法。

BDS運動佇聲明內底講，英國現行的公共合約法是根據歐盟法律，允准排除有犯「 重大不正行為」的公司參與投標。所以BDS建議支持者，抵制有牽涉著以色列違反人權行為的公司，毋是因為遮的公司設佇以色列才共抵制。

BDS運動批評英國政府是咧威脅公部門單位，講「這个政府是一个世代以來上蓋親以色列的，比（前首相）Margaret Thatcher當初替種族隔離的南非辯護閣較超過」。

其實抵制分真濟層次，意見毋是簡單的贊成佮反對爾爾。英國《獨立報》的社論指出，反猶主義佇英國升高，確實予人煩惱，毋過政府袂當共所有對以色列的抗議攏看做過激行動。

這篇社論講，抵制無應該像BDS運動組織主張的，針對規个以色列；應該愛針對非法的佔領區，英國幾若个地方政府就是按呢做，這嘛符合歐盟的立場。

文章講，英國政府的這步，無定是受著美國的壓力，這是反背巴勒斯坦人民。共針對非法政府行動的合法抗議消音，是失德的外交政策。

2005年，巴勒斯坦的團體發起訴求抵制、撤資、制裁的BDS運動，對以色列施壓，佇世界得著濟濟支持。英國嘛有一寡地方政府加入，拒買以色列的產品，尤其是佔領區約旦河西岸生產的。In認為這是一種道德責任。圖片取自：Takver – Israel – Boycott, divest, sanction，創用cc授權